بھارتی سینما کے معروف اداکار اور فلمساز ایان مکھرجی کے والد، دیب مکھرجی، 83 برس کی عمر میں چل بسے۔ بھارتی میڈیا کے مطابق، وہ طویل علالت کے بعد جمعہ کی صبح ممبئی میں اپنے گھر میں اس دنیا سے رخصت ہو گئے۔

خاندانی ذرائع کے مطابق، دیب مکھرجی کی آخری رسومات ممبئی کے علاقے جوہو میں ادا کی گئیں۔ خاندان کی جانب سے جاری کردہ بیان میں کہا گیا: ”ہمیں یہ اطلاع دیتے ہوئے انتہائی افسوس ہو رہا ہے کہ دیب مکھرجی ہمیں چھوڑ کر چلے گئے ہیں۔“

دیب مکھرجی نے 1960 اور 1970 کی دہائی میں کئی فلموں میں معاون کردار ادا کیے جن میں ”تو ہی میری زندگی“، ”دو آنکھیں“، ”باتوں باتوں میں“، ”جو جیتا وہی سکندر“، اور ”کنگ انکل“ شامل ہیں۔ ان کی ہدایتکاری میں 1983 میں ”کراٹے“ نامی فلم بھی ریلیز ہوئی تھی، جس میں متھن چکرورتی، کاجل کرن اور یوگیتا بالی نے مرکزی کردار ادا کیے۔

شاہ رخ خان نادرعلی کے کریئر کا آخری انتخاب کیوں ہیں؟

دیب مکھرجی کا تعلق بھارتی سینما کے مشہور مکھرجی خاندان سے تھا۔ وہ فلم ساز آشوتوش گواریکر کے سسر اور معروف بالی وڈ اداکارائیں کاجول اور رانی مکھرجی کے چچا تھے۔ ان کی والدہ ستی دیوی مشہور اداکار اشوک کمار، انوپ کمار اور کشور کمار کی واحد بہن تھیں، اور ان کے بھائی فلمساز شومو مکھرجی نے بالی وڈ اداکارہ تنوجا سے شادی کی، جو کاجول کی والدہ ہیں۔

دیب مکھرجی کی آخری رسومات میں ان کے خاندان کے افراد اور قریبی دوستوں نے شرکت کی۔ ان میں کاجول، رانی مکھرجی، جیا بچن، عالیہ بھٹ، رنبیر کپور، ہریتھک روشن اور دیگر شامل تھے، جنہوں نے انہیں خراج عقیدت پیش کیا۔