معروف اداکارہ طوبیٰ انور نے ایک حالیہ انٹرویو میں انکشاف کیا ہے کہ شوبز انڈسٹری سے وابستہ چند خواتین فنکاروں نے ایک واٹس ایپ گروپ تشکیل دیا ہے، جس کا مقصد ذہنی دباؤ، تنہائی اور جذباتی مسائل سے نمٹنے میں ایک دوسرے کی مدد کرنا ہے۔

طوبیٰ انور کے مطابق یہ اقدام اداکارہ حمیرا اصغر علی کی افسوسناک موت کے بعد اٹھایا گیا، جو بظاہر شدید تنہائی اور سماجی تعاون کی کمی کا شکار تھیں۔

حمیرا اصغر کی موت: پراسرار حالات، قتل کا شبہ، جعلی شکایت اور خاندان میں اختلافات— معاملہ مزید الجھ گیا

انہوں نے کہا کہ شوبز سے جڑی کئی اداکارائیں ایسے شہروں میں کام کر رہی ہیں جہاں ان کے خاندان موجود نہیں ہوتے اور تنہائی ان کے لیے ایک بڑا چیلنج بن جاتی ہے۔ ان کی بھی کی ایسی دوست ہیں جو دوسرے شہر سے تعلق رکھتی ہیں اور اپنے خاندان سے دور کام کے سلسلے میں یہاں آئی ہیں۔

اداکارہ کا کہنا تھا کہ واٹس ایپ گروپ کے ذریعے تمام فنکارائیں ایک دوسرے کی خیریت دریافت کرتی ہیں، اپنی باتیں شیئر کرتی ہیں اور کوشش کرتی ہیں کہ کوئی ساتھی ذہنی دباؤ یا تنہائی کا شکار نہ ہو۔ طوبیٰ انور نے مزید کہا کہ حمیرا کی موت نے انڈسٹری میں ذہنی صحت اور آپس کی سپورٹ کی اہمیت کو اجاگر کر دیا ہے۔

موت سے قبل حمیرا اصغر کی انسٹاگرام پوسٹ نے نئی بحث چھیڑ دی

انہوں نے بتایا کہ اس گروپ میں شامل فنکارائیں اب نہ صرف ذاتی مسائل پر بات کرتی ہیں بلکہ اپنے تجربات اور جذبات بھی بانٹتی ہیں، تاکہ شوبز کی چمک دمک کے پیچھے چھپے دباؤ اور احساسِ تنہائی کا مقابلہ کیا جا سکے۔

ماہرین کے مطابق شوبز انڈسٹری میں کام کرنے والوں کو اکثر سخت مقابلے، غیر یقینی حالات اور تنقید کا سامنا کرنا پڑتا ہے، جس کی وجہ سے ذہنی مسائل جنم لیتے ہیں۔ اس پس منظر میں اداکاراؤں کی جانب سے اٹھایا گیا یہ قدم نہایت مثبت اور قابلِ تقلید قرار دیا جا رہا ہے۔