مقبول بھارتی اداکار وجے دیورا کونڈا جو تیلگو سمیت دیگر فلموں میں اپنی اداکاری کے لیے جانے جاتے ہیں پہلگام واقعے پر مبینہ طور پر نسل پرستانہ گفتگو کرنے کے بعد قانونی مشکل میں پھنس گئے۔
انڈیا ٹوڈے کے مطابق ریاست تلنگانہ کے دارالحکومت حیدرآباد میں وکیل کشور لال چوہان کی درخواست پر وجے دیورا کونڈا کے خلاف مقدمہ دائر کیا گیا ہے۔
حیدرآباد کے ایس آر نگر پولیس اسٹیشن میں اداکار پر ذات پات اور برادریوں کے حوالے سے نامناسب اور نفرت انگیز باتیں کرنے کے الزامات لگائے گئے ہیں۔
وجے دیورا کونڈا نے رشمیکا مندانا سے تعلق پر خاموشی توڑ دی
وجے دیورا کونڈا نے تقریب میں پہلگام واقعے پر بات کرتے ہوئے یہ تاثر دیا تھا کہ حملے میں کشمیری لوگ ہی ملوث ہیں، جنہیں تعلیم اور تربیت دینے کی ضرورت ہے تاکہ کوئی بھی ان کی ذہن سازی نہ کر سکے۔
بھارتی اداکار نے تقریب میں کہا تھا کہ کشمیر بھارت کا حصہ ہے اور کشمیری بھی ہمارے ہی ہیں، یہ بات ان کو سمجھنی چاہیے۔
وجے دیورا کونڈا نے مزید کہا تھا کہ پہلگام حملے کے بعد پاکستان پر حملہ کرنے کی ضرورت نہیں، کیوں کہ وہاں کی حکومت اور عوام اپنے ہی مسائل میں الجھے ہوئے ہیں۔
ان کی جانب سے پہلگام واقعے پر بات کرنے کے بعد ان کے خلاف مقدمہ دائر کیا گیا، جس کے بعد اداکار نے وضاحتی بیان جاری کرتے ہوئے قبائلی افراد سے معافی بھی مانگی۔
وجے دیورا کونڈا کا وضاحتی بیان میں کہنا تھا کہ ان کا مقصد کسی قبائلی شخص یا قبیلے کی دل آزاری کرنا نہیں تھا، اگر ان کے الفاظ سے کسی کی دل آزاری ہوئی ہے تو وہ معافی کے طلب گار ہیں۔
