اتر پردیش کے ضلع خاجنی میں ایک شخص نے مبینہ طور پر دو افراد پر اس وقت فائرنگ کردی جب انہوں نے اسے ایک دعوت کے دوران موٹاپے پر طنز کا نشانہ بنایا۔ پولیس کے مطابق یہ واقعہ جمعرات کو پیش آیا، جبکہ اس کی شکایت جمعہ کو تھانے میں درج کروائی گئی۔ پولیس نے فوری کارروائی کرتے ہوئے ملزم کو اسی روز گرفتار کرلیا۔
تفصیلات کے مطابق، ارجن چوہان، جو کہ علاقہ بیل گھاٹ کا رہائشی ہے، چند روز قبل اپنے چچا کے ہمراہ ایک مندر کے قریب منعقدہ اجتماعی دعوت میں شریک تھا۔ اسی دوران دعوت میں موجود دو مہمانوں انیل چوہان اور شبھم چوہان نے مبینہ طور پرارجن کے وزن پر طنز کیا اور اسے ’موٹو‘ کہہ کر پکارا۔
دنیا کے سب سے وزنی بچے نے اپنا وزن کم کیسے کیا؟
پولیس کے مطابق اس مذاق سے غضبناک ہو کر ارجن چوہان نے اپنے ایک دوست کے ساتھ مل کر ان دونوں افراد کا تعاقب کیا۔ اور ملزمان نے تنیواء ٹول پلازہ کے قریب گاڑی روک کر ان دونوں کو گاڑی سے باہر نکالا اور ان پر فائرنگ کرکے فرار ہوگئے۔
راہگیروں نے دونوں زخمی افراد کو فوری طور پر ضلع اسپتال منتقل کیا، جہاں سے انہیں مزید علاج کے لیے ضلع میڈیکل کالج ریفر کر دیا گیا۔ خوش قسمتی سے دونوں افراد کی جان خطرے سے باہر ہے۔
شبھم چوہان کے والد کی مدعیت میں درج ایف آئی آر کی بنیاد پر پولیس نے کارروائی کرتے ہوئے دونوں ملزمان کو دوسرے دن ہی گرفتار کر لیا۔
