چین کے شہر شنگھائی میں ایک 25 سالہ نوجوان کو دنیا بھر کی سیاحت کے شوق میں جیب کاٹنے کے الزام میں گرفتار کر لیا گیا۔ نوجوان کا نام صرف ”آن“ ظاہر کیا گیا ہے، وہ شنگھائی کی ایک اعلیٰ یونیورسٹی سے فارغ التحصیل ہے اور ایک بڑی کمپنی میں ہیومن ریسورسز کے شعبے میں ملازم ہے۔
شنگھائی ٹی وی کے مطابق آن نے گزشتہ تین برسوں میں 120 سے زائد ملکی اور غیر ملکی دورے کیے جب کہ اس کی ماہانہ آمدنی محض 10 ہزار یوان (تقریباً 1,400 امریکی ڈالر) ہے جو اس پرتعیش طرزِ زندگی کے لیے ناکافی تھی۔
ایک سے زیادہ کریڈٹ کارڈز رکھنے کے باوجود قرض کے جال سے کیسے بچیں؟
پولیس نے آن کو اس وقت گرفتار کیا جب ایک شخص ”لی“ نوکری کے انٹرویو کے بعد اپنی جیب کٹنے کی شکایت لے کر پولیس کے پاس پہنچا۔ لی نے پولیس کو بتایا کہ آن کا رویہ انٹرویو کے دوران مشکوک تھا اور بعد میں اسے بینک سے فون آیا کہ اس کے کریڈٹ کارڈ سے ایک غیر ملکی ملک کے لیے ریٹرن ایئر ٹکٹ خریدا گیا ہے اور ٹکٹ آن کے نام پر تھا۔
آن کے گھر کی تلاشی کے دوران پولیس کو دو مزید بٹوے ملے، جو ”ژو“ اور ”ژانگ“ نامی افراد کے تھے۔ ژو آن کا دفتر کا ساتھی تھا، جس کے بٹوے میں شناختی کارڈز اور ایک ہزار یوان موجود تھے۔ ژو نے پولیس کو اطلاع نہیں دی کیوں کہ اسے واقعہ معمولی لگا۔ آن نے اعتراف کیا کہ اس نے ژو کا بٹوہ دفتر سے چرایا تھا۔
دوسری طرف ژانگ نے بتایا کہ وہ اپنا بٹوہ دبئی انٹرنیشنل ایئرپورٹ پر چیک اِن کاؤنٹر پر رکھ کر کچھ دیر کے لیے گیا اور جب واپس آیا تو بٹوہ غائب تھا۔ بٹوے میں 20 ہزار یوان (تقریباً 3 ہزار امریکی ڈالر) کی نقدی اور کریڈٹ کارڈز تھے۔ مصروفیت کے باعث ژانگ نے بھی پولیس کو رپورٹ نہیں کیا۔
پولیس کو دیے گئے بیان میں آن نے کہا: ’مجھے سفر کرنا اور سوشل میڈیا پر اپنی تصاویر پوسٹ کرنا بہت پسند ہے۔ میں نئے ماحول میں آسانی سے دوست بنا لیتا ہوں، رات کو ان سے گپ شپ ہوتی ہے اور بعض اوقات جنسی تعلق بھی قائم ہوتا ہے۔ یہ میری زندگی کے خوبصورت لمحات ہیں۔‘ گرفتاری سے چند روز قبل آن افریقہ جانے کی تیاری کر رہا تھا اور اس نے متعلقہ ویکسینز بھی لگوا لی تھیں۔
