تصور کریں آپ کسی ایسے ہوائی اڈے پر اتر رہے ہوں جو نہ صرف خوبصورت اور تکنیکی اعتبار سے اپنی مثال آپ ہو بلکہ انوکھا اور منفرد بھی ہو۔ جہاں ہوائی جہاز کی اڑتی پرواز کا شور بھی ہو اور ریل گاڑیوں کی ٹریک ٹریک کی آواز بھی سنائی دے۔
مہم جو پسند مسافروں کے لیے دنیا میں ایسی جگہوں کی دریافت ان کو انجانی خوشی دیتی ہے جو روایت سے ہٹ کر ہوں۔ نیوزی لینڈ کا گِسبورن ایئرپورٹ پر ایک انوکھا منظر دیکھنے کو ملتا ہے جہاں ریل گاڑیاں اور ہوائی جہاز ایک ہی جگہ اور ایک ہی رن وے پرساتھ ساتھ چلتے ہیں، ایک دوسرے کا انتظار کرتے ہیں اور اپنی اپنی راہ اختیار کرتے ہیں۔
دھاتوں کو ’سونے‘ میں تبدیل کرنے کا دعویٰ، نئی کمپنی نے تہلکہ مچا دیا
گِسبورن ایئرپورٹ تقریباً 160 ہیکٹر رقبے پر پھیلا ہوا ہے اور اسے پالمرسٹن نارتھ سے گِسبورن تک جانے والی ریل لائن دو حصوں میں تقسیم کرتی ہے۔
اس منفرد سیٹ اپ کی بدولت، ریل گاڑیاں اور ہوائی جہازوں کو آپس میں ہم آہنگی کے ساتھ چلنا پڑتا ہے۔ روزانہ صبح 6:30 بجے سے شام 8:30 بجے تک یہ دونوں نظام فعال رہتے ہیں اور اس کے بعد رن وے بند کر دیا جاتا ہے تاکہ محفوظ آپریشن یقینی بنایا جا سکے۔
ہالی وڈ اسٹار وِل اسمتھ کا بیٹا منشیات کا عادی؟ عجیب برتاؤ کی ویڈیو وائرل
یہ نظام اپنی نوعیت کا منفرد ترین انتظام ہے۔ ہوائی اڈے کا عملہ ریل لائن کے سگنلز کو کنٹرول کرتا ہے، تاکہ جب ہوائی جہاز لینڈ کر رہے ہوں یا اڑان بھر رہے ہوں تو ریل گاڑیوں کو روکا جا سکے اور جب ریل گاڑی گزر رہی ہو تو ہوائی جہاز انتظار کرے۔ اس انوکھے بندوبست کی بدولت نہ صرف حادثات سے بچاؤ ہوتا ہے بلکہ مسافروں کو بہترین سہولت بھی میسر آتی ہے۔
گِسبورن سٹی وینٹیج ریل وے کے تحت چلنے والی بھاپ سے چلنے والی پرانی ریل گاڑیاں موریوائی اور گِسبورن کے درمیان سفر کرتی ہیں۔ یہ تاریخی لوکوموٹوز سال میں تقریباً 15 مرتبہ، خصوصاً گرمیوں کے موسم میں، جب سیاحتی کروز شپ آتی ہیں، رن وے کراس کرتی ہیں۔ یہ نادر مناظر ہوائی اڈے کے عملے کی محنت اور مکمل شیڈولنگ کی بدولت بغیر کسی خلل کے انجام پاتے ہیں۔
نیوزی لینڈ کے 62 ہوائی اڈوں میں سے ایک، گِسبورن ایئرپورٹ، ایلگِن علاقے میں واقع ہے۔ اگرچہ یہ ہوائی اڈہ چھوٹا سا ہے، مگر یہاں سالانہ تقریباً ڈیڑھ لاکھ مسافر سفر کرتے ہیں اور ہفتے میں 60 سے زائد گھریلو پروازیں انجام پاتی ہیں۔ اس کی ڈیزائننگ میں تین ذیلی رن ویز بھی شامل ہیں جو اس کی فعالیت اور حفاظت کو مزید بڑھاتے ہیں۔
دنیا بھر میں گیسورن کے علاوہ کہیں بھی ایسا دوسرا ہوائی اڈہ نہیں جہاں ایک فعال رن وے پرریل گاڑیاں چلتی ہوں۔ ٹاسمانیاء کے وینیارڈ ایئرپورٹ میں بھی کبھی ایسا انتظام تھا، لیکن وہاں 2005 میں ریل آپریشن بند کر دیا گیا۔ اس اعتبار سے گِسبورن ایئرپورٹ تکنیکی اور انتظامی لحاظ سے ایک نادر مثال ہے۔
گِسبورن ایئرپورٹ صرف تکنیکی انفرادیت ہی نہیں بلکہ اپنے آس پاس کے قدرتی مناظر کے لیے بھی مشہور ہے۔ یہاں کے پرسکون ساحل، ہری بھری کھیتیاں اور صاف ستھرا ماحول ہر مسافر کو دلکشی کا احساس دلاتا ہے۔
لیکن سب سے زیادہ توجہ کا مرکز وہ منظر ہے جب ایک ریل گاڑی اور ایک ہوائی جہاز ایک دوسرے کا انتظار کرتے ہوئے رن وے پر کھڑے ہوتے ہیں۔ یہ انوکھی صورتحال، جب کیمروں میں قید ہو کر سوشل میڈیا پر وائرل ہو جاتی ہے توہر دیکھنے والے کو حیران اور محظوظ کر دیتی ہے۔
اگر آپ اگلی بارنیوزی لینڈ کا سفر کریں تو گِسبورن ایئرپورٹ کی یہ منفرد خوبصورتی اور انتظامی تکنیک ضرور دیکھیں۔ یہ جگہ نہ صرف مہم جوئی کی روح کو زندہ کرتی ہے بلکہ انسان کی محنت اور قدرت کے حسین امتزاج کی بھی بہترین مثال ہے۔
