آپ کی زبان آپ کی مجموعی صحت کی حالت کا پتہ دیتی ہے۔

بیماری کی تشخیص کے لیے آنکھوں کے ساتھ ساتھ زبان کا معائنہ کرنا قدیم طب اور ماہرین کی جانب سے صدیوں سے استعمال کی جانے والی ایک عام روایت ہے۔ زبان کا رنگ، ساخت، شکل اور اس پر موجود تہہ کی مقدار، ڈاکٹروں کو آپ کی موجودہ تکلیف کی تہہ اورجسم میں موجود مسائل کی نشاندہی کرنے میں مدد دیتی ہے۔

یہاں زبان پر ظاہر ہونے والی پانچ اہم انتباہی علامات بتائی جا رہی ہیں جنہیں آپ گھر پر بھی چیک کر سکتے ہیں، تاہم یہ طبی مشورے کا متبادل نہیں ہیں۔

زبان کے رنگ میں تبدیلی

ایک صحت مند زبان کا رنگ عام طور پر ہلکے گلابی سے گہرے گلابی کے درمیان ہوتا ہے۔ زبان کے رنگ میں اچانک تبدیلیاں صحت کے مسائل کی نشاندہی کر سکتی ہیں۔ درج ذیل رنگوں پر خاص توجہ دیں۔

چمکدار لال زبان: یہ انفیکشن، بخار، ذہنی دباؤ یا وٹامن بی کی کمی کی علامت ہو سکتی ہے۔

پیلی زبان: عام طور پر خون کی کمی (انیمیا) یا جسم میں غذائی اجزاء کی کمی سے منسلک ہوتی ہے۔

نیلی یا جامنی زبان: خون کی گردش میں مسئلہ، دل یا پھیپھڑوں کی بیماریوں کی نشاندہی کر سکتی ہے۔

پیلی تہہ والی زبان: یہ ہاضمے کے مسائل یا جگر کی بیماریوں کی علامت ہو سکتی ہے۔

زبان پر غیر معمولی تہہ

زبان کی سطح پر ایک باریک تہہ مردہ خلیات اور بیکٹیریا کی ہوتی ہے جو قدرتی ہے۔ لیکن اگر زبان پر تہہ موٹی، دھبے دار یا غیر معمولی رنگ کی ہو تو یہ عام طور پر صحت کے کسی مسئلے کی علامت ہوتی ہے۔

سفید تہہ: اکثر منہ میں فنگس انفیکشن (اوورل تھرش) یا پانی کی کمی (ڈی ہائیڈریشن) کی نشاندہی کرتی ہے۔

پیلی یا سبز تہہ: بعض اوقات یہ بیکٹیریل انفیکشن یا نظام ہضم کے مسائل کی علامت ہو سکتی ہے۔

کالی اور بالوں جیسی زبان: عام طور پر ناقص صفائی، تمباکو نوشی یا کچھ دوائیوں کے استعمال کی وجہ سے ہوتی ہے، مگر یہ شاذ و نادر ہی کسی سنگین بیماری کی علامت ہوتی ہے۔

زبان کا سوجنا یا بڑا ہونا

زبان کا سوج جانا یا غیر معمولی بڑا ہونا عام طور پر الرجی، انفیکشنز یا ہارمونی عدم توازن کی علامت ہو سکتا ہے۔

سوجن: یہ الرجک ردعمل، انفیکشن یا کچھ بیماریوں جیسے کہ ہائپوتھائرائیڈزم (تھائیرائیڈ کی کم سرگرمی) کی وجہ سے ہو سکتی ہے۔

زبان کے کناروں پر دانتوں کے نشانات

جب زبان سوج جاتی ہے تو اس کے کناروں پر دانتوں کے نشانات یا گڑھے نظر آنے لگتے ہیں، کیونکہ زبان سوج کر دانتوں سے ٹکراتی ہے۔ اس حالت کو ”اسکالپڈ زبان“ (Scalloped Tongue) بھی کہا جاتا ہے اور یہ کئی وجوہات کی علامت ہو سکتی ہے:

ذہنی دباؤ یا پریشانی کی وجہ سے زبان کو زور سے دانتوں کے ساتھ دبانا یا دباؤ ڈالنا۔

تھائرائیڈ کے مسائل، جیسے کہ تھائرائیڈ کی کم یا زیادہ سرگرمی۔

جسم میں پانی کا جمع ہونا (فلوئڈ ریٹینشن) جس سے زبان سوج سکتی ہے۔

زبان پر چھوٹے چھوٹے نشانات معمول کی بات ہو سکتے ہیں، لیکن اگر یہ نشانات مسلسل موجود رہیں اور کنارے نمایاں طور پر دانتوں کے نشانوں سے بھر جائیں تو طبی معائنہ ضروری ہو جاتا ہے۔

زبان پر سرخ دھبے یا زخم

زبان پر سرخ دھبے، دھبے دار نشان، دردناک زخم یا گانٹھیں مختلف انفیکشنز، جلن اور بعض سنگین طبی مسائل کی نشاندہی کر سکتی ہیں۔

سرخ دھبوں کا ظاہر ہونا زبان میں سوزش یا وٹامنز کی کمی کی علامت ہو سکتا ہے۔

دردناک زخم انفیکشنز، چوٹ یا خود کار مدافعتی نظام کی بیماریوں (آٹو امیون) کی وجہ سے پیدا ہو سکتے ہیں۔

اگر زبان پر مستقل گانٹھیں یا رنگت میں تبدیلیاں ہوں تو کینسر یا کینسر سے پہلے کی حالت کی جانچ کے لیے فوری طبی معائنہ ضروری ہے۔

منہ کی اچھی صفائی زبان کو صحت مند رکھنے میں بہت مددگار ثابت ہوتی ہے۔ دانت صاف کرتے ہوئے اپنی زبان کو ہلکے ہاتھ سے صاف کریں، ساتھ ہی وافر مقدار میں پانی پئیں، سگریٹ نوشی سے پرہیز کریں اور ایسی متوازن غذا کا استعمال کریں جس میں وٹامنز اور معدنیات شامل ہوں۔

آپ کی زبان ایک آسان مگر مؤثر ذریعہ ہے۔ زبان کے رنگ، ساخت، تہہ، شکل اور حجم میں تبدیلیوں سے غذائی کمی، انفیکشنز اور دائمی بیماریوں جیسی صحت کی مسائل کی جلد شناخت ممکن ہو جاتی ہے۔