مشہور کمپنی ’کوڈیک‘ نے اپنے تازہ ترین مالی رپورٹ میں خبردار کیا ہے کہ اسے اپنے آنے والے قرضوں کی ادائیگی میں مشکلات پیش آ رہی ہیں۔ کمپنی نے بتایا ہے کہ اس کے پاس 500 ملین ڈالر کے قرض کی ادائیگی کے لیے ’پختہ مالی مدد یا دستیاب نقدی‘ نہیں ہے۔ اس کے نتیجے میں، کمپنی نے یہ بھی کہا کہ ان حالات کی وجہ سے کمپنی کے مستقبل پر سوالات اٹھ سکتے ہیں۔
سی این این نیوز کی ایک رپورٹ کے مطابق کوڈیک نے اپنے مالی بحران سے نمٹنے کے لیے فیصلہ کیا ہے کہ وہ اپنے ریٹائرمنٹ پینشن پلان کی ادائیگی روک دے گا۔ اس کا کہنا ہے کہ اس کا کاروبار امریکی مارکیٹ میں مضبوط ہے اور ٹیرف کے اثرات اس پر زیادہ نہیں ہوں گے کیونکہ وہ اپنے کیمروں، رنگوں اور فلمز سمیت کئی مصنوعات امریکہ میں بناتا ہے۔
کوڈیک کے سی ای او جِم کانٹینیزا نے کہا کہ کمپنی دوسرے ربع میں اپنے طویل المدتی منصوبے پر کام کر رہی ہے، حالانکہ کاروباری ماحول میں غیر یقینی صورتحال ہے۔ ان کا مزید کہنا تھا کہ کمپنی کو اپنے قرضوں کی ادائیگی کے لیے ایک مناسب حل ملنے کی اُمید ہے۔
کوڈیک کے شیئرز میں گزشتہ دنوں 25 فیصد سے زیادہ کی کمی آئی ہے، جس سے سرمایہ کاروں کے درمیان تشویش بڑھ گئی ہے۔
تاریخی پس منظر
کمپنی کا آغاز 1892 میں ہوا تھا، لیکن اس کے بانی جارج ایسٹ مین نے 1879 میں ایک اہم پیٹنٹ حاصل کیا تھا جس سے فوٹوگرافی کو عوامی سطح پر متعارف کرایا گیا۔ 1888 میں کوڈیک نے پہلا کیمرہ فروخت کیا اور اس کا سلوگن یا نعرہ تھا، ’آپ بٹن دبائیں، ہم باقی کام کر دیں گے۔‘
ایک وقت تھا جب کوڈاک امریکہ میں کیمروں اور فلمز کا 90 فیصد مارکیٹ شیئر رکھتا تھا۔ 1970 کی دہائی میں اس کی مصنوعات بے حد مقبول ہوئیں، اور مشہور گلوکار پال سائمن کا گانا ’کوڈاکروم‘ 1973 میں ہٹ ہوا۔
ڈیجیٹل کیمرہ کی ایجاد اور ناکامی
کوڈاک نے 1975 میں پہلا ڈیجیٹل کیمرہ متعارف کرایا، لیکن اس نئی ٹیکنالوجی کو اپنانے میں ناکامی کے سبب کمپنی کو نقصان اٹھانا پڑا۔ 2012 میں، کوڈیک نے دیوالیہ پن کے لیے درخواست دی اور اس کے قرضوں کی مقدار 6.75 ارب ڈالر تک پہنچ گئی۔
حکومت کی جانب سے امداد
2020 میں، کوڈیک کو امریکی حکومت کی طرف سے ایک نیا موقع ملا، جب اسے فارماسیوٹیکل اجزاء بنانے کے لیے منتخب کیا گیا۔ اس کی اسٹاک کی قیمت تیزی سے بڑھی، لیکن یہ عارضی تھا۔ اب کوڈیک نے اس شعبے میں مزید سرمایہ کاری کرنے کا ارادہ کیا ہے۔
اگرچہ کوڈیک کے لئے مشکلات کم نہیں ہو رہیں، تاہم کمپنی کا کہنا ہے کہ وہ اپنی مالی حالت کو بہتر بنانے کے لیے مختلف اقدامات کر رہی ہے۔
