پاکستانی فلم انڈسٹری کی ماضی کی معروف اور دبنگ اداکارہ نشو نے کہا ہے کہ جب ریکھا شادی کریں گی تو میں بھی شادی کرلوں گی۔

کئی دہائیوں پر محیط شاندار فلمی کیریئررکھنے والی باوقار انداز اور بے باک بیانات کے لیے مشہور نشو نے حال ہی میں ایک پوڈکاسٹ میں اپنی چوتھی شادی سے متعلق گردش کرنے والی خبروں پر کھل کر بات کی۔

ریمبو کا صاحبہ کی والدہ نشو بیگم کو کرارا جواب

اداکارہ نشو نے چوتھی شادی کی خبروں کی تردید کرتے ہوئے واضح کیا کہ وہ فی الحال سنگل ہیں اور زندگی کو بھرپور انداز میں گزار رہی ہیں۔ البتہ اگر قسمت نے چاہا تو وہ ایک بار پھر شادی کے بندھن میں بندھنے کو تیار ہیں۔

انہوں نے ہنستے ہوئے کہا’’مجھے تو خود نہیں معلوم میں نے کس سے شادی کی ہے، یہ سب افواہیں پھیلانے والوں سے پوچھیں، آخر وہ کون ہے جس سے میں نے نکاح کر لیا؟‘‘

معروف اداکارہ کا بہو پر سونا اور پیسے چرانے کا الزام

نشو کا کہنا ہے کہ انہیں آج بھی بے شمار رشتے آتے ہیں۔ لیکن وہ ایک ملکہ کی طرح اپنی مرضی کی آزادانہ زندگی گذار رہی ہیں اور ان کا فی الحال کسی رشتے میں بندھنے کا کوئی ارادہ نہیں۔‘‘

تاہم، انہوں نے یہ بھی تسلیم کیا کہ قسمت کے لکھے کو کوئی نہیں ٹال سکتا ۔ ان کا کہنا تھا،’’اگر قسمت میں لکھا ہوگا تو میں ضرور شادی کروں گی۔ میں نے اپنی زندگی میں یہ باب ابھی مکمل طور پر بند نہیں کیا۔‘‘

نشو نے اسلام کا حوالہ دیتے ہوئے کہا کہ، ہمارے دین میں خواتین کی شادی کےلیے عمر کی کوئی قید نہیں ہے اور وہ اجازت دیتا ہے کہ عورت جب چاہے شادی کرسکتی ہے۔

انہوں نے ہمارے معاشرے کا سعودی عرب سے موازنہ کرتے ہوئےکہا کہ سعودی عرب کی مثال ہمارے سامنے ہے۔ جہاں عورت بیوہ ہونے یا طلاق لینے کے بعد فورا شادی کر لیتی ہے اور اسے معیوب نہیں سمجھا جاتا ۔ جبکہ ہمارے معاشرے میں نکاح کرنے پر ہی انگلیاں اٹھنا شروع ہوجاتی ہیں۔

انہوں نے مسکراتے ہوئے کہا کہ جب ریکھا شادی کے گی تو میں بھی شادی کرلوں گی۔

اداکارہ نشو کی زندگی ایک کھلی کتاب کی مانند ہے۔ وہ اپنی ذاتی زندگی کے بارے میں بہت کھل کر بات کرتی ہیں اور اپنے مداحوں کے ساتھ اپنی روزمرہ کی صورتحال اور تجربات شیئر کرتی رہتی ہیں۔

یاد رہے کہ اداکارہ نشوبیگم نے 3 شادیاں کیں، جس میں سے ایک شادی طلاق پر ختم ہوئی جب کہ باقی دونوں شادیوں میں وہ بیوہ ہوگئیں ۔