پاکستانی ڈرامہ انڈسٹری کے معروف اداکار دانش تیمور نے سوشل میڈیا پر شاندار کامیابی حاصل کر کے اپنے مداحوں کے دل جیت لیے ہیں۔ دانش تیمور انسٹاگرام پر سب سے زیادہ فالو کیے جانے والے پاکستانی اداکار بن گئے ہیں۔ ان کے فالوورز کی تعداد 8.8 ملین تک پہنچ گئی ہے۔

یہ کامیابی نہ صرف ان کے مداحوں کے لیے خوشی کا باعث بنی بلکہ ان کی اہلیہ اور معروف اداکارہ عائزہ خان کے لیے بھی فخر کا موقع فراہم کیا۔ عائزہ خان نے اپنے انسٹاگرام اکاؤنٹ پر دانش تیمور کی اس کامیابی پر خوشی کا اظہار کیا اور انہیں بھرپور انداز میں سراہا۔

انہوں نے لکھا کہ، ’ڈیجیٹل دنیا کی محبت حقیقی زندگی کی محبت کا مقابلہ نہیں کر سکتی، لیکن یہ اس بات کا ثبوت ہے کہ لوگ آپ کو دل سے چاہتے ہیں اورآپ کی محنت کی قدر کرتے ہیں۔‘

اداکار نے ڈرامہ انڈسٹری میں اپنی فنی صلاحیتوں، یادگار کرداروں اور شاندار اسکرین پرفارمنس کے ذریعے اپنی پہچان بنائی ہے۔ ان کی کامیابی نے نہ صرف سوشل میڈیا پر بلکہ حقیقی زندگی میں بھی ان کے مداحوں اور شائقین کے دل میں ان کی مقبولیت کو مزید بڑھا دیا ہے۔