پاکستانی فلم و ٹی وی انڈسٹری کے معروف اداکار اور پروڈیوسر سعود قاسمی نے کامیاب ازدواجی زندگی کا سب سے بڑا راز خاموش رہنا قرار دیا۔
سعود اپنی ورسٹائل اداکاری اور کامیاب پروڈکشنز کے باعث شوبز کا نمایاں نام ہیں۔ حال ہی میں ایک شو میں شریک ہوئے، جہاں انہوں نے اپنی شادی کی دلچسپ یادوں اور کامیاب ازدواجی زندگی کے راز پر کھل کر گفتگو کی۔
سعود نے بتایا کہ ایک پروگرام میں ان کی بہن نے پہلی بار انہیں جویریہ دکھائی۔ اس وقت انہیں یہ علم نہیں تھا کہ وہ ٹی وی ایکٹریس ہیں۔ وہیں موجود اداکار ریمبو نے غلطی سے جویریہ کے بجائے سینئر اداکارہ غزالہ جاوید کو دیکھ لیا کیونکہ دونوں نے سیاہ لباس پہنا ہوا تھا۔
ریمبو نے مذاقاً کہا، ’کیا تم پاگل ہو گئے ہو؟ کیا اس سے شادی کرو گے؟‘ جس پر سعود نے جواب دیا، ’اس میں کیا برائی ہے؟‘ لیکن جب اصل میں جویریہ کو دکھایا تو ریمبو خوش ہو گئے۔
انہوں نے مزید بتایا کہ اگلے ہی دن مرحوم امجد صابری ان کا رشتہ جویریہ کے گھر لے گئے۔ بعد ازاں ان کے قریبی دوست بریگیڈیئر حارث نواز بھی رشتہ لے کر گئے۔ اس کے علاوہ ریمبو اور اداکار شان کے ساتھ سعود آدھی رات کو لاہور میں جویریہ کے گھر گئے اور وہاں باضابطہ پروپوز کیا۔
سعود نے انکشاف کیا کہ وہ اور جویریہ 2005 میں رشتہ ازدواج میں منسلک ہوئے اور اب ان کی شادی کو 20 سال ہو چکے ہیں۔
شادی کی کامیابی کے راز پر بات کرتے ہوئے انہوں نے کہا، ’کامیاب ازدواجی زندگی کا سب سے بڑا راز خاموش رہنا ہے، چاہے وہ مرد ہو یا عورت۔ اگر ایک شریکِ حیات غصے میں ہو تو دوسرے کو خاموش رہنا چاہیے۔‘
انہوں نے مزید کہا کہ بچوں کے بعد زندگی کا محور بدل جاتا ہے اور اسی توازن میں شادی مضبوط ہوتی ہے۔
یاد رہے کہ اداکار سعود حال ہی میں وہ ”بےبی باجی“، ”محبت ست رنگی“ اور ”بےبی باجی کی بہوئیں“ جیسے ڈراموں میں اپنی پرفارمنس سے مداحوں سے داد سمیٹ چکے ہیں۔
