ایسا شاید ہی کوئی ہو جس نے ہیری پوٹر کی کتاب نہ پڑھی ہو یا س کی فلمیں نہ دیکھی ہوں، اگر آپ نے یہ فلمیں دیکھی ہیں تو ضرور ہیری پوٹر کی کھڑوس آنٹی مارج ڈورسلی کو بھی جانتے ہوں گے، جو ”ہیری پوٹر اینڈ دی پرزنر آف ازکابان“ کے ایک مزاحیہ سین میں اڑتی دکھائی دیتی ہیں۔

وہ تو فلم تھی، لیکن ہفتہ کو حقیقت میں آنٹی مارج کو اڑتا دیکھ کر لندن کے شہریوں کو اپنی آنکھوں پر یقین نہ آیا۔

برطانوی اخبار ”دی مرر“ کی ایک رپورٹ کے مطابق، صبح لندن باسیوں کی آنکھ کھلی تو انہوں نے دیکھا کہ 95 کلوگرام وزنی اور 11.7 میٹر لمبی آنٹی مارج شہر کے تاریخی نشان کے سامنے ہوا میں منڈلا رہی تھیں۔

یہ دراصل ایک غبارہ تھا جسے آنٹی مارج کی شکل دی گئی تھی، اور اسے ماہر ڈیزائنرز اور فنکاروں کی ایک 16 رکنی ٹیم نے تیار کیا تھا۔

اس پروجیکٹ کو مکمل کرنے میں کل 264 گھنٹے لگے، ٹیم نے آنٹی مارج کی مشابہت کی ہر تفصیل کو احتیاط سے تیار کیا۔

ہوا میں تیرتی آنٹی مارج کو وارنر برادرز اسٹوڈیو ٹور لندن نے ”ہیری پوٹر اینڈ دی پریزنر آف ازکابان“ کی سنیما ریلیز کی 20 ویں سالگرہ کی یاد میں تیار کیا۔