ممبئی: بالی ووڈ کی معروف رقاصہ و اداکارہ نورا فتیحی اتوار کی شام ممبئی ایئرپورٹ پر شدید غم کی حالت میں دیکھی گئیں۔

سیاہ لباس اور سیاہ چشمہ پہنے نورا فتیحی کو ایئرپورٹ کے احاطے میں کیمروں نے قید کیا، جب وہ آنکھوں سے آنسو صاف کرتے ہوئے تیزی سے ٹرمینل کی جانب بڑھ رہی تھیں۔

کولہاپوری بنام پراڈا: فیشن کی جنگ میں کرینہ کپور کی دبنگ انٹری

نورا فتیحی عام طور پر عوامی مقامات پر مداحوں اور فوٹوگرافروں سے خوش اخلاقی سے پیش آتی ہیں، لیکن اس بار ان کا رویہ مختلف تھا اور انہوں نے کسی سے کوئی بات نہیں کی۔

سوشل میڈیا پر وائرل ہونے والی ویڈیوز میں دیکھا گیا کہ نورا پاپارازی سے نظریں چرا رہی تھیں اور نہایت مغموم انداز میں کسی سے بات کیے بغیر ایئرپورٹ کے اندر داخل ہو گئیں۔

منور فاروقی کی دوسری شادی کی پس پردہ حقیقت انہوں نے خود بتادی

ان کے ہمراہ ایک سیکیورٹی گارڈ بھی موجود تھا، جس نے ایک مداح کی جانب سے سیلفی لینے کی کوشش پر ناراضی ظاہر کرتے ہوئے اسے پیچھے ہٹا دیا۔

واقعے سے قبل نورا فتیحی نے اپنے انسٹاگرام اکاؤنٹ پر ایک اسٹوری شیئر کی تھی جس میں انہوں نے عربی میں ”إِنَّا لِلّٰهِ وَإِنَّا إِلَيْهِ رَاجِعُونَ“ لکھا یہ دعا مسلمانوں کی جانب سے کسی کے انتقال پر پڑھی جاتی ہے۔

نورا نے اس پیغام کے ساتھ کسی قسم کی تفصیل فراہم نہیں کی، تاہم ان کے اس انداز اور جذباتی کیفیت سے یہ اندازہ لگایا جا رہا ہے کہ ان کے کسی نہایت قریبی رشتہ دار یا دوست کا انتقال ہوا ہےاور امکان ہے کہ وہ اپنے کسی قریبی عزیز کی آخری رسومات میں شرکت کے لیے جا رہی ہوں۔

مداحوں کی جانب سے بھی نورا کی اس حالت پر افسوس کا اظہار کیا جا رہا ہے۔ ایک صارف نے سوشل میڈیا پر تبصرہ کیا،”لگتا ہے کسی قریبی عزیز کی موت ہوئی ہے، ایسے وقت میں مداحوں کو حدود کا خیال رکھنا چاہیے۔“

نورا فتیحی، جن کا تعلق مراکش سے ہے اور جو کینیڈین شہریت رکھتی ہیں، نے 2018 میں فلم ’رور: ٹائیگر آف دی سندر بن‘ سے بالی ووڈ میں انٹری دی۔ تاہم انہیں اصل شہرت فلم ”صرف تم“ کے مقبول گانے دلبر سے ملی، جس میں ان کے ڈانس نے انہیں راتوں رات اسٹار بنا دیا۔ اس کے بعد وہ کئی فلموں اور آئٹم نمبرز کا حصہ رہ چکی ہیں۔

فلموں کے علاوہ نورا نے متعدد ریئلٹی شوز میں بھی شرکت کی، جن میں بگ باس 9، جھلک دکھلا جا 9، اور حالیہ ڈانس دیوانے شامل ہیں۔ وہ اپنی فٹنس، ڈانس اور اسٹائل کی وجہ سے نوجوانوں میں خاصی مقبول ہیں۔

کام کے حوالے سے نورا کو آخری بار او ٹی ٹی پلیٹ فارم کی ویب سیریز “ دی رائلز“ میں دیکھا گیا تھا، جس میں انہوں نے ایشان کھٹر، بھومی پیڈنیکر، ساکشی تنور، زینت امان اور ڈینو موریا کے ساتھ کام کیا۔

تاحال نورا فتیحی کی طرف سے اس ذاتی سانحے پر کوئی باضابطہ بیان جاری نہیں کیا گیا، لیکن ان کی انسٹاگرام اسٹوری اور ایئرپورٹ پر جذباتی کیفیت نے مداحوں اور میڈیا کو تشویش میں مبتلا کر دیا ہے۔