پاکستانی اداکارہ نیلم منیر کے ہاں پہلے بیٹے کی پیدائش ہوئی ہے۔ تاہم اداکارہ نے تاحال خود اس خبر کی باضابطہ تصدیق نہیں کی۔
نیلم کے شوہر کے قریبی دوست نے سوشل میڈیا پلیٹ فارم ٹک ٹاک پر جوڑے کے ہاں بیٹے کی آمد کی خوشخبری شیئر کی۔
وائرل پیغام میں اپنے دوست کو مبارکباد پیش کرتے ہوئے لکھا کہ ”میرے پیارے بھائی کے گھر بیٹے کی پیدائش ہوئی ہے، جس پر دل کی گہرائیوں سے مبارکباد پیش کرتا ہوں“ اور نومولود کے لیے نیک تمناؤں کا اظہار بھی کیا۔
واضح رہے کہ اداکارہ نیلم منیر جنوری 2025 میں رشتہ ازدواج میں منسلک ہوئی تھیں۔ ان کی شادی کی پروقار تقریبات اور یادگار تصاویر دبئی میں بنائی گئی تھیں، جہاں شادی کے بعد سے وہ اپنی نجی زندگی میں مصروف ہیں۔
نیلم منیر پاکستانی ڈراموں اور فلموں میں اپنی اداکاری کے باعث خاصی مقبول ہیں۔ شادی کے بعد بھی وہ مختلف مواقع پر شوبز سرگرمیوں میں نظر آتی رہی ہیں۔
جیسے ہی بیٹے کی پیدائش کی یہ خبر سوشل میڈیا پر وائرل ہوئی، نیلم منیر کے چاہنے والوں اور مداحوں کی بڑی تعداد نے سوشل میڈیا پر خوشی کا اظہار کرتے ہوئے نومولود کے لیے صحت اور لمبی عمر کی دعائیں بھیجی ہیں۔
مداح اب اس بات کے منتظر ہیں کہ اداکارہ جلد خود اپنے انسٹاگرام یا دیگر آفیشل ہینڈلز پر اس خوشی کا باضابطہ اعلان کریں۔
