پاکستانی اداکارہ ہانیہ عامر نے کراچی میں صومالی قزاقوں کے قبضے میں قید پاکستانیوں کے اہل خانہ کے احتجاج پر پولیس کی کارروائی پر سخت تنقید کی ہے۔

سوشل میڈیا پر وائرل ہونے والی ایک ویڈیو کے بعد اداکارہ نے اپنے بیان میں کہا کہ ہمارے ہاں ایک خطرناک روایت بن چکی ہے کہ ہم بغیر کسی احتساب اور جواب دہی کے ایک سانحے سے دوسرے سانحے کی طرف بڑھ جاتے ہیں۔

انہوں نے سوال اٹھایا کہ عوام کو مزید کتنے ایسے مناظر دیکھنے ہوں گے تب جا کر حالات میں کوئی مثبت تبدیلی آئے گی۔

یہ سارا معاملہ اس وقت سامنے آیا جب کراچی کی شاہراہ فیصل پر ان پاکستانیوں کے عزیز و اقارب دھرنا دیے بیٹھے تھے جن کے بارے میں بتایا جاتا ہے کہ وہ گزشتہ اپریل سے صومالی قزاقوں کے پاس یرغمال ہیں۔ ان اہل خانہ کا احتجاج اس سے قبل ہونے والی ایک اور پرامن ریلی سے پہلے اس وقت روکا گیا تھا جب پولیس نے انہیں مبینہ طور پر حراست میں بھی لیا تھا۔

پولیس نے اپنے موقف میں وضاحت کرتے ہوئے کہا ہے کہ انہوں نے مظاہرین پر کوئی طاقت استعمال نہیں کی بلکہ وزارت خارجہ کے رابطہ دفتر کے قریب بیٹھے لوگوں کو وہاں سے اٹھانے کے لیے صرف بات چیت اور سمجھانے کی کوشش کی تھی۔

گزشتہ پانچ مہینے کے دوران یہ اہل خانہ اپنے پیاروں کی رہائی کے لیے کئی بار احتجاج ریکارڈ کرا چکے ہیں لیکن تاحال حکومت کی جانب سے اس معاملے میں کوئی خاطر خواہ پیش رفت سامنے نہیں آ سکی ہے۔

ہانیہ عامر اس مہم میں اکیلی نہیں ہیں بلکہ ان کے علاوہ اور بھی کئی نامور پاکستانی فنکار ملاحوں کی بازیابی کے لیے آواز اٹھا چکے ہیں۔ ماہرہ خان، صبیحہ فاروق اور گلوکار طلحہ انجم سمیت کئی شوبز شخصیات ان یرغمال پاکستانیوں کی خیریت اور محفوظ واپسی کے لیے آواز اٹھا چکے ہیں۔

پندرہ ملین سے زائد فالوورز رکھنے والی ہانیہ عامر اکثر تفریحی دنیا کے علاوہ بھی فلاحی اور سماجی امور پر کھل کر اپنی رائے کا اظہار کرتی دکھائی دیتی ہیں۔ اداکارہ کو آخری بار ڈرامہ ’کبھی میں کبھی تم‘ میں دیکھا گیا تھا۔

اس کے علاوہ وہ نیٹ فلکس کے منصوبے ’جو بچے ہیں سنگ سمیٹ لو‘ کا بھی حصہ ہیں، جس میں ان کے ساتھ صنم سعید، فواد خان اور ماہرہ خان بھی شامل ہیں۔