بولی ووڈ کے دبنگ اداکار سلمان خان نے اپنے مداحوں سے جڑے رہنے کے لیے ایک نیا یوٹیوب چینل ’بینگ دی سلمان خان‘ شروع کیا ہے۔ اس چینل کا مقصد اداکار کی فلمی دنیا کے سفر، ان کے بات چیت کے انداز اور باڈی لینگویج کو ایک مزے دار اور سبق آموز طریقے سے ناظرین کے سامنے پیش کرنا ہے۔

سلمان خان نے حال ہی میں اپنے انسٹاگرام اکاؤنٹ پر اس چینل کا لنک شیئر کرتے ہوئے مداحوں کو اسے دیکھنے کی دعوت دی۔ انہوں نے لکھا کہ وہ بالکل شروع سے شروعات کر رہے ہیں اور اس سرکاری یوٹیوب چینل پر اے سے زیڈ تک تمام معلومات ملیں گی۔

عام فنکاروں کے یوٹیوب چینل کے برعکس، جہاں زیادہ تر نجی زندگی یا فلموں کے پس پردہ لمحات دکھائے جاتے ہیں، سلمان خان کے اس چینل کا انداز کافی مختلف ہے۔

اس چینل پر پیش کی جانے والی ویڈیوز میں سلمان خان خود دو دوہرے روپ میں نظر آتے ہیں۔ ایک روپ میں وہ ایک تجربہ کار ایکٹنگ اور پرسنالٹی کوچ کا کردار ادا کرتے ہیں، جبکہ دوسرے روپ میں وہ ایک نئے سیکھنے والے شاگرد کی طرح نظر آتے ہیں۔ وہ خود ہی اپنے انداز، ڈائیلاگ بولنے کی مہارت اور باڈی موومنٹس کی تربیت دیتے ہوئے دکھائی دیتے ہیں۔

سلمان خان نے یہ چینل 22 ستمبر کو بنایا تھا اور اب تک اس پر دس مختصر ویڈیوز اپ لوڈ کی جا چکی ہیں۔

یہ پہلا موقع نہیں ہے جب سلمان خان یوٹیوب کا رخ کر رہے ہیں۔ اس سے قبل سال 2020 میں انہوں نے اپنا میوزک چینل سلمان خان فلمز میوزک شروع کیا تھا، جس کے سبسکرائبرز کی تعداد لاکھوں میں ہے۔ اس چینل پر ان کی فلموں کے گانے اور انفرادی طور پر گائے گئے گیت جاری کیے گئے تھے۔

کورونا وائرس کی وبا کے دوران سلمان خان نے گلوکاری کے میدان میں بھی قدم رکھا تھا۔ اس دوران انہوں نے ’پیار کرونا‘ اور ’تیرے بنا‘ جیسے گانے ریلیز کیے تھے۔ اب نئے چینل کے ذریعے وہ مداحوں کو اپنی شخصیت کا ایک مختلف رخ دکھانے کی کوشش کر رہے ہیں۔

یوٹیوب پر اپنے چینل بنانے اور مداحوں سے راست رابطہ قائم کرنے کا رجحان بولی ووڈ اور جنوبی ہند کی فلم انڈسٹری کے ساتھ ساتھ ٹی وی فنکاروں میں بھی تیزی سے بڑھ رہا ہے۔

عالیہ بھٹ، پریانکا چوپڑا جوناس، کارتک آریان، نورا فتیحی، جیکولین فرنینڈس، ورون دھون، شلپا شیٹی اور فرح خان سمیت کئی معروف شخصیات اس پلیٹ فارم پر موجود ہیں۔

جنوبی بھارتی فلم انڈسٹری کے اداکار الو ارجن اور موہن لال بھی اپنے آفیشل یوٹیوب چینلز چلا رہے ہیں، جبکہ ٹی وی شخصیات دیپیکا ککڑ، شعیب ابراہیم، جنت زبیر اور انوشکا سین بھی اپنی روزمرہ زندگی، سفر اور ذاتی تجربات سے متعلق ویڈیوز شیئر کرتی رہتی ہیں۔

اگر سلمان خان کے دیگر پروجیکٹس کی بات کی جائے تو وہ ان دنوں مشہور ڈیجیٹل شو بگ باس سیزن20 کی میزبانی کر رہے ہیں۔ فلمی محاذ پر وہ جلد ہی ہدایت کار اپوروا لاکھیا کی فلم ’ماتر بھومی‘ میں نظر آئیں گے، جس کا نام پہلے ’بیٹل آف گلوان‘ رکھا گیا تھا۔ اپوروا لاکھیا کی ہدایت کاری میں بننے والی اس فلم میں چترانگدا سنگھ بھی شامل ہیں

فلم کی ریلیز میں تاخیر ہو چکی ہے اور ابھی نئی تاریخ کا اعلان نہیں کیا گیا ہے۔