پاکستان تحریکِ انصاف (پی ٹی آئی) کے بانی عمران خان کی سابق اہلیہ جمائما گولڈ اسمتھ نے 22 سال بعد دوبارہ شادی کرلی ہے۔ 52 سالہ جمائما 62 سالہ آئرش نژاد کاروباری شخصیت اور ملٹی ملینئر فنانسر کیمرون او ریلی کے ساتھ رشتہ ازدواج میں منسلک ہوگئی ہیں۔
جمائما کی دوسری شادی کی خبر ان کے خاندان کی جانب سے سوشل میڈیا پر شیئر کی گئی۔ جمائما کے بھائی بین گولڈ اسمتھ نے شادی کی تصدیق کی، جبکہ ان کی اہلیہ جن کا نام بھی جمائما جونز ہے، انہوں نے انسٹاگرام پر شادی کی تقریب کی ایک تصویر شیئر کرتے ہوئے نو بیاہتا جوڑے کو مبارکباد دی۔
جمائما کی بھابھی نے تصویر کے ساتھ لکھا، ’’جمائما اور کیمرون کی شادی کا جشن، میری پسندیدہ شخصیت کے ساتھ، کیا خوشی کا دن ہے۔‘‘
اطلاعات کے مطابق شادی ایک نجی تقریب میں ہوئی اور جوڑے نے اپنی ذاتی زندگی کو زیادہ سے زیادہ نجی رکھنے کو ترجیح دی ہے۔ شادی کی خبر ایسے وقت میں سامنے آئی ہے جب رواں سال مئی میں جمائما اور کیمرون کی منگنی کی اطلاعات منظرعام پر آئی تھیں۔
جمائما اور کیمرون کی ملاقات کیسے ہوئی؟
جمائما اور کیمرون کی ملاقات فلموں اور ڈاکیومنٹریز سے متعلق پیشہ ورانہ کام کے دوران ہوئی۔ کیمرون او ریلی متعدد فلموں اور ڈاکیومنٹریز میں ایگزیکٹو پروڈیوسر کے طور پر کام کرچکے ہیں۔
قریبی ذرائع کے مطابق دونوں پہلے دوست بنے اور بعد میں ان کی دوستی محبت میں تبدیل ہوئی۔ ایک ذریعے نے بتایا تھا کہ وہ بطور جوڑا ایک سال سے کچھ زیادہ عرصے سے ساتھ تھے اور کیمرون اپنی نجی زندگی کو منظرعام سے دور رکھنے کو ترجیح دیتے ہیں، جبکہ جمائما بھی ان کی پرائیویسی کا خاص خیال رکھتی ہیں۔
رپورٹس کے مطابق دونوں کچھ عرصے سے سوئٹزرلینڈ میں کیمرون کی رہائش گاہ اور مغربی لندن میں جمائما کے گھر کے درمیان وقت ساتھ گزارتے تھے۔ جمائما کے خاندان کے کئی افراد، جن میں ان کے بھائی رابن برلی بھی شامل ہیں، کیمرون سے مل چکے ہیں اور ان کے ساتھ اچھے تعلقات قائم ہوگئے تھے۔
کیمرون او ریلی کون ہیں؟
کیمرون او ریلی ایک آئرش نژاد آسٹریلوی فنانسر اور کاروباری شخصیت ہیں۔ وہ مرحوم سر انتھونی او ریلی کے بیٹے ہیں اور معروف میڈیا کاروباری شخصیت ہونے کے ساتھ آئرلینڈ کی قومی رگبی ٹیم کے سابق کھلاڑی بھی تھے۔
آکسفورڈ یونیورسٹی سے تعلیم حاصل کرنے والے کیمرون نے اپنے ابتدائی پیشہ ورانہ دور میں اپنے خاندان کے میڈیا کاروبار سے وابستہ ہو کر کام کیا۔ وہ آسٹریلوی میڈیا گروپ اے پی این نیوز اینڈ میڈیا کے چیف ایگزیکٹو بھی رہے اور 2000 میں اس عہدے سے الگ ہوگئے۔
2003 میں کیمرون اوریلی نے نجی ایکویٹی فرم بیارڈ کیپیٹل قائم کی۔ اس کے اگلے سال، 2004 میں، بیارڈ کیپیٹل نے سوئٹزرلینڈ کی توانائی میٹرنگ کمپنی لینڈس+گائر حاصل کی، جس کے بعد کیمرون اس کمپنی کے چیف ایگزیکٹو بھی رہے۔
2011 میں جاپانی کمپنی توشیبا نے لینڈس+گائر کو تقریباً 2.3 ارب ڈالر میں خرید لیا۔
کیمرون او ریلی کے چار بچے ہیں اور وہ اپنی نجی زندگی کو عموماً میڈیا کی توجہ سے دور رکھتے ہیں۔ جمائما کے عمران خان سے دو بیٹے، سلیمان اور قاسم، ہیں۔
عمران خان اور جمائما کی شادی
جمائما گولڈ اسمتھ اس سے قبل عمران خان کی اہلیہ رہ چکی ہیں۔ دونوں نے 1995 میں شادی کی تھی اور تقریباً نو سال بعد ان کے درمیان 2004 میں علیحدگی ہوگئی تھی۔
اس شادی سے ان کے دو بیٹے سلیمان اور قاسم پیدا ہوئے۔ علیحدگی کے بعد جمائما اپنے دونوں بیٹوں کے ساتھ برطانیہ میں ہی مقیم تھیں۔ دونوں نے بعد میں بھی اپنے بچوں کی وجہ سے ایک دوسرے کے ساتھ رابطہ برقرار رکھا اور سابق جوڑے کے تعلقات مجموعی طور پر خوشگوار رہے۔
جمائما نے عمران خان سے شادی کے بعد پاکستان میں بھی کئی برس گزارے، بعد ازاں انہوں نے برطانیہ میں صحافت، اسکرین رائٹنگ، فلم اور ڈاکیومنٹری پروڈکشن کے شعبوں میں اپنا کیریئر بنایا۔ وہ مختلف ٹیلی ویژن اور فلمی منصوبوں سے وابستہ رہیں اور ایک ایوارڈ یافتہ پروڈیوسر کے طور پر بھی شناخت بنائی۔
جمائما کی نجی زندگی اور نیا باب
عمران خان سے علیحدگی کے بعد جمائما کا نام برطانوی اداکار ہیو گرانٹ سمیت بعض دیگر معروف شخصیات کے ساتھ بھی جوڑا جاتا رہا، تاہم حالیہ برسوں میں انہوں نے اپنی نجی زندگی کو زیادہ تر میڈیا کی نظروں سے دور رکھا۔
کیمرون او ریلی کے ساتھ ان کا تعلق بھی طویل عرصے تک عوامی سطح پر سامنے نہیں آیا۔ رواں سال مئی میں ان کی منگنی کی خبریں سامنے آنے کے بعد پہلی مرتبہ یہ تعلق بڑے پیمانے پر خبروں کا موضوع بنا۔ اس وقت قریبی ذرائع نے بتایا تھا کہ دونوں ایک دوسرے کے ساتھ خوش ہیں اور خاندان بھی اس رشتے سے مطمئن ہے۔
جمائما کی دوسری شادی ان کی والدہ لیڈی اینابیل گولڈ اسمتھ کی وفات کے تقریباً ایک سال بعد ہوئی ہے۔ لیڈی اینابیل برطانوی معاشرے کی معروف شخصیت تھیں، جبکہ جمائما کے والد سر جیمز گولڈ اسمتھ ایک ارب پتی کاروباری شخصیت تھے جن کا انتقال 1997 میں ہوا۔
خاندان کی جانب سے شادی کی محدود تفصیلات اور صرف قریبی افراد کی تصاویر سامنے آنے سے ظاہر ہوتا ہے کہ جمائما اور کیمرون نے اس موقع کو بڑے پیمانے پر تشہیر کے بجائے نجی خاندانی تقریب تک محدود رکھا۔
یوں عمران خان سے شادی کے خاتمے کے دو دہائیوں سے زیادہ عرصے بعد جمائما گولڈ اسمتھ نے اپنی زندگی کا ایک نیا باب شروع کردیا ہے، جبکہ ان کے نئے شریک حیات کیمرون او ریلی بھی اپنے کاروباری اور میڈیا پس منظر کے باعث ایک نمایاں شخصیت ہیں۔
