گھر کے باتھ روم، نالیوں اور دیگر نم جگہوں پر سینٹی پیڈز یعنی کن کھجوروں کا نظر آنا عام بات ہے۔ یہ کیڑے عموماً ان جگہوں کو پسند کرتے ہیں جہاں نمی زیادہ ہو اور اندھیرے میں چھپنے کے لیے جگہ موجود ہو۔ اگر آپ کے باتھ روم میں بھی یہ کیڑے بار بار دکھائی دیتے ہیں تو صرف انہیں مارنے کے بجائے ان کے آنے کی وجہ ختم کرنا زیادہ ضروری ہے۔
باتھ روم میں نمی کم کرنے اور کیڑوں کے داخل ہونے کے راستے بند کرنے سے سینٹی پیڈز کی آمد کو کم کیا جا سکتا ہے۔ گھر میں موجود بعض عام چیزیں بھی اس سلسلے میں مددگار ثابت ہوسکتی ہیں۔
نمک کا استعمال
نمک عام طور پر ہر گھر میں موجود ہوتا ہے۔ اگر باتھ روم کے کسی کونے یا ایسی جگہ جہاں نمی زیادہ رہتی ہو، وہاں سینٹی پیڈز بار بار نظر آتے ہیں تو وہاں تھوڑی مقدار میں نمک رکھا یا چھڑکا جا سکتا ہے۔ نمک نمی کو کم کرنے میں مدد کرتا ہے جس سے وہ جگہیں کیڑوں کے لیے نامناسب ہو جاتی ہیں۔
تاہم صرف نمک استعمال کرنا کافی نہیں۔ اگر فرش یا دیوار مسلسل گیلی رہتی ہے تو نمی کی اصل وجہ تلاش کرنا ضروری ہے۔
سفید سرکے کا اسپرے
ایک اسپرے والی بوتل میں پانی اور سفید سرکہ ملا کر ایک محلول تیار کریں۔ اس محلول کو باتھ روم کے کونوں، دروازوں کے ارد گرد اور ان تمام جگہوں پر ہلکا سا اسپرے کریں جہاں سے کیڑوں کے آنے کا خدشہ ہو۔
سرکہ استعمال کرتے وقت اسے بلیچ یا دیگر صفائی کے کیمیکلز کے ساتھ نہ ملائیں کیونکہ خطرناک گیس بن سکتی ہے۔ کسی سطح پر زیادہ مقدار میں اسپرے کرنے سے پہلے چھوٹی جگہ پر آزما لینا بھی بہتر ہے۔
باتھ روم کو خشک رکھنا
سینٹی پیڈز کو نم اور گیلی جگہیں بہت پسند ہوتی ہیں۔ نہانے کے بعد فرش پر پانی جمع نہ ہونے دیں اور باتھ روم کی کھڑکی یا ایگزاسٹ فین کی مدد سے ہوا کی آمد و رفت کو یقینی بنائیں۔
اگر باتھ روم میں مسلسل سیلن، پانی کا رساؤ یا لیکیج ہے تو پہلے اس مسئلے کو حل کرنا چاہیے۔ صرف کیڑے بھگانے والے طریقے استعمال کرنے سے مسئلہ مستقل طور پر ختم نہیں ہوگا۔
نالی پر جالی کا استعمال
باتھ روم کی نالیاں کیڑوں کی افزائش کا بڑا مرکز بن سکتی ہیں۔ نالی پر ایسا ڈھکن یا جالی لگائیں جو پانی کو تو آسانی سے گزرنے دے لیکن کیڑوں کو اندر یا باہر جانے سے روکے۔ نالی کو باقاعدگی سے صاف رکھیں اور اس کے ارد گرد موجود دراڑوں یا خلا کی فوراً مرمت کروائیں۔
دراروں کو بند کرنا
باتھ روم کی دیواروں، فرش یا پائپوں کے ارد گرد موجود چھوٹی دراڑوں میں یہ کیڑے چھپ جاتے ہیں۔ اسپرے کرنے کے ساتھ ساتھ ان تمام ممکنہ چھپنے کی جگہوں اور دراڑوں کو سیلانٹ کی مدد سے اچھے طریقے سے بند کر دینا زیادہ مؤثر ثابت ہوتا ہے۔
نیم کا استعمال
نیم کی تیز خوشبو بہت سے کیڑوں کو دور رکھنے کی صلاحیت رکھتی ہے۔ آپ نیم کے پتوں کو پانی میں ابال کر اس ٹھنڈے پانی کو باتھ روم کے کونوں میں استعمال کر سکتے ہیں۔ اگر نیم کا تیل استعمال کر رہے ہیں تو اسے ہمیشہ پروڈکٹ کی ہدایات کے مطابق ہی استعمال کریں۔
