ہالی ووڈ اداکارہ مارگریٹ کوالی نے فلم ’دی ڈاگ اسٹارز‘ کے لندن پریمیئر میں چینل کی ایسی منفرد سینڈلز پہن کر شرکت کی جسے دیکھ کر پہلی نظر میں یہ اندازہ لگانا بھی مشکل تھا کہ انہوں نے جوتے پہن رکھے ہیں۔ مشہور فرانسیسی برینڈ ’چینل‘ کی اس نئی تخلیق کو ’نیکڈ سینڈلز‘ یا ’بارفٹ فٹ ویئر‘ کہا جا رہا ہے اور اس نے فیشن کی دنیا میں نئی بحث چھیڑ دی ہے۔

مارگریٹ کوالی اس ڈیزائن کو ریڈ کارپٹ پر متعارف کرانے والی پہلی بڑی معروف شخصیت بن گئی ہیں۔ سینڈلز کا ڈیزائن اس قدر کم سے کم ہے کہ سامنے سے لی گئی کئی تصاویر میں اداکارہ کے پاؤں تقریباً مکمل طور پر ننگے دکھائی دیتے ہیں۔ اس میں بنیادی طور پر ٹخنے کے گرد جوتے کا ایک حصہ موجود ہے، جبکہ پاؤں کے باقی حصے کو تقریباً کھلا چھوڑ دیا گیا ہے۔

یہ سینڈلز معروف ڈیزائنر میتھیو بلازی نے رواں سال اپریل میں چینل کے کروز 2027 فیشن شو کے دوران پیش کی تھیں۔ ڈیزائن سامنے آنے کے فوراً بعد فیشن شائقین کی توجہ اس طرف مبذول ہوئی اور سوشل میڈیا پر اس اسٹائل پر مختلف آرا سامنے آئیں۔

روایتی طور پر جوتوں کا مقصد پاؤں کو ڈھانپنا، سہارا دینا اور زمین سے تحفظ فراہم کرنا سمجھا جاتا ہے، تاہم چینل کے اس ڈیزائن میں پاؤں کو ڈھانپنے کے بجائے اسے تقریباً مکمل طور پر نمایاں رکھا گیا ہے۔ یہی وجہ ہے کہ اسے فیشن کی اصطلاح میں ’نیکڈ‘ یا ’بارفٹ‘ فٹ ویئر کا نام دیا جا رہا ہے۔

مارگریٹ کوالی کی ریڈ کارپٹ پر آمد کے بعد سوشل میڈیا پر بھی اس سینڈل کے بارے میں خاصی گفتگو ہوئی۔ بعض صارفین نے اسے محض ایک فیشن تجربہ قرار دیا جبکہ کچھ نے طنزیہ انداز میں کہا کہ اگر جوتا پاؤں کو ڈھانپ ہی نہیں رہا تو پھر اس کا وجود کس حد تک ضروری ہے۔ بعض تبصروں میں اداکارہ کے انتخاب پر بھی مزاحیہ انداز اپنایا گیا۔

معروف برینڈ چینل نے اس طرز کی سینڈلز کے کئی ڈیزائن تیار کیے ہیں، جن میں سنہری رنگ کے نمایاں عناصر والا ایک انداز بھی شامل ہے۔ تاہم ان سینڈلز کی قیمت ابھی ظاہر نہیں کی گئی۔ چینل کی کروز 2027 کلیکشن نومبر سے دکانوں میں دستیاب ہونے کی توقع ہے۔

فیشن ماہرین اور شائقین کے لیے یہ ڈیزائن اس لیے بھی دلچسپ ہے کہ حالیہ عرصے میں روایتی جوتوں سے ہٹ کر غیر معمولی اور بعض اوقات عجیب و غریب فٹ ویئر توجہ حاصل کر رہے ہیں۔ ایسے ڈیزائن بھی سامنے آئے ہیں جو جان بوجھ کر عام خوبصورتی کے معیار سے مختلف دکھائی دیتے ہیں۔

چینل کی ’نیکڈ سینڈلز‘ مقبول فیشن رجحان بنتی ہیں یا صرف ایک محدود ڈیزائن تجربہ ثابت ہوتی ہیں، اس کا فیصلہ آنے والے مہینوں میں ہوگا۔ البتہ مارگریٹ کوالی کی ریڈ کارپٹ پر موجودگی نے اس منفرد فٹ ویئر کو عالمی سطح پر فیشن گفتگو کا موضوع ضرور بنا دیا ہے۔