بولی ووڈ اداکار گووندا اور ان کی اہلیہ سنیتا آہوجا کے درمیان گھریلو تنازع ایک بار پھر سرخیوں میں آ گیا ہے۔ حال ہی میں ممبئی کے مشہور گنپتی پنڈال لال باغیچا راجا میں گووندا کی اپنی فلمی ساتھی اور مبینہ طور پر جڑے نام والی کومل رانی سوارنکر کے ساتھ آمد نے میڈیا اور سوشل میڈیا پر ہنگامہ برپا کر دیا ہے۔ دلچسپ بات یہ ہے کہ اسی دن سنیتا آہوجا نے بھی اکیلے ہی اسی پنڈال پر حاضری دی تھی۔ جس کے کچھ گھنٹوں بعد گووندا اور کومل رانی کو ایک ساتھ پنڈال میں دیکھا گیا۔
گنپتی دربار میں گووندا اور کومل رانی کو ایک ساتھ دیکھ کر سوشل میڈیا پر ایک نیا طوفان کھڑا ہو گیا۔ گووندا نے اس موقع پر سفید کرتا پاجامہ پہن رکھا تھا جبکہ کومل سرخ ساڑھی اور زیورات میں نظر آئیں۔ دونوں نے گنپتی بپا کی پوجا کی اور گووندا نے آرتی میں بھی شرکت کی۔ بعد میں دونوں کو فوٹوگرافرز کے سامنے ایک ساتھ دیکھا گیا۔
اس معاملے نے اس وقت مزید توجہ حاصل کی جب کومل رانی کی کچھ ویڈیوز سامنے آئیں جن میں وہ سندور لگائے نظر آئیں۔
تاہم بھارتی میڈیا رپورٹس کے مطابق مکمل ویڈیو میں دکھائی دیا کہ گنپتی بپا کے قدموں میں لگا سندور ان کے سر پر اس وقت لگا جب انہوں نے آشیرواد لینے کے لیے سر جھکایا۔
ادھر گووندا کی اہلیہ سنیتا آہوجا نے اگلے روز پاپارازی سے گفتگو کے دوران نام لیے بغیر ایسا بیان دیا جسے سوشل میڈیا صارفین نے گووندا اور کومل رانی کے معاملے سے جوڑ دیا۔
انہوں نے اپنے غصے کا اظہار کرتے ہوئے کہا کہ انسان دھوکے باز ہوتے ہیں جبکہ جانور زیادہ مخلص ہوتے ہیں کیونکہ وہ کم از کم چمٹے رہتے ہیں اور دھوکہ نہیں دیتے۔
سنیتا کا یہ بیان سوشل میڈیا پر تیزی سے وائرل ہو گیا ہے اور لوگ اس پر طرح طرح کے تبصرے کر رہے ہیں۔
واضح رہے کہ پچھلے کچھ مہینوں سے گووندا اور کومل رانی کے تعلقات کے حوالے سے کافی افواہیں گردش کر رہی ہیں، جنہیں دونوں فریقین کی طرف سے باضابطہ طور پر تصدیق نہیں کیا گیا۔
اس سے قبل اگست کے مہینے میں بھی سنیتا نے دعویٰ کیا تھا کہ دونوں شادی کرنے کا ارادہ رکھتے ہیں تاہم گووندا کے منیجر ششی سنہا نے ان تمام خبروں کو مسترد کرتے ہوئے واضح کیا تھا کہ دوسری شادی کا کوئی سوال ہی پیدا نہیں ہوتا اور گووندا اب بھی سنیتا کے ساتھ رشتہ ازدواج میں منسلک ہیں۔
فروری 2025 میں بھی طلاق کی خبریں سامنے آئی تھیں جنہیں بعد میں جوڑے نے باہمی رضامندی سے حل کر لیا تھا۔
پیشہ ورانہ محاذ کی بات کی جائے تو گووندا اور کومل رانی جلد ہی آنے والی فلم روپا میں ایک ساتھ اسکرین شیئر کرتے ہوئے نظر آئیں گے۔ اس فلم کے ذریعے گووندا طویل عرصے بعد بڑی اسکرین پر واپسی کر رہے ہیں اور وہ خود اس فلم کے پروڈیوسر بھی ہیں۔
اس کے علاوہ دونوں کے ایک اور پروجیکٹ دنیاداری میں بھی ساتھ کام کرنے کی چہ میگوئیاں جاری ہیں۔
