ہالی ووڈ کی معروف گلوکارہ اور اداکارہ ملی سائرس نے اپنے قریبی دوست اور موسیقار میکس مورنڈو کے ساتھ شادی کرلی۔ دونوں کی شادی کی تقریب امریکی ریاست کیلیفورنیا کے شہر پام اسپرنگز میں منعقد ہوئی، جس میں قریبی رشتہ داروں اور دوستوں نے شرکت کی۔
غیر ملکی میڈیا رپورٹ کے مطابق ملی سائرس اور میکس مورنڈو نے ہفتے 21 نومبر کو ایک نجی تقریب میں شادی کی۔ شادی کی خاص بات یہ تھی کہ معروف میوزک بینڈ ’دی فلیمنگ لپس‘ کے گلوکار وین کوائن نے شادی کی رسومات ادا کروائیں۔
شادی کی تقریب ایک سوئمنگ پول کے قریب منعقد ہوئی، جہاں سفید پھولوں سے سجا خوبصورت محرابی ڈھانچا بنایا گیا تھا۔ اس موقع پر ملی سائرس نے سفید ساٹن کا ایک روایتی عروسی لباس زیب تن کر رکھا تھا، جبکہ ان کے دولہا میکس مورنڈو سیاہ سوٹ میں نظر آئے۔
تقریب کے دوران ملی سائرس اپنے جذبات پر قابو نہ رکھ سکیں اور عہد لیتے وقت ان کی آنکھوں سے خوشی کے آنسو چھلک پڑے۔
تقریب میں گلوکارہ کی والدہ ،والد، بہن اور دیگر قریبی عزیزوں کے علاوہ اداکارہ الزبتھ ہرلی بھی شریک ہوئیں۔
شادی کی تقریبات کا آغاز ایک روز پہلے عشائیے سے ہوا، جس کی کچھ جھلکیاں ملی کی سوتیلی بہن للی روز پرسل نے انسٹاگرام پر شیئر کیں۔
عشائیے میں میزوں کو گہرے سرخ پھولوں اور چھوٹی موم بتیوں سے سجایا گیا تھا اور ان پر دولہا دلہن کے ناموں کے ابتدائی حروف ’ایم پلس ایم‘ درج دیکھے گئے۔
ملی سائرس اور میکس مورنڈو کے تعلقات کی خبریں پہلی مرتبہ 2021 میں سامنے آئی تھیں، جب دونوں ایک فیشن تقریب میں ایک ساتھ دکھائی دیے۔ دونوں کی ملاقات ایک مشترکہ جاننے والے کے ذریعے طے شدہ ملاقات میں ہوئی تھی۔
میکس مورنڈو لاس اینجلس کے راک بینڈ ’لیلی‘ کے ڈرمر ہیں۔ وہ 2024 کے گریمی ایوارڈز میں بھی ملی سائرس کے ساتھ شریک ہوئے تھے، جہاں ان کے گانے ’فلاورز‘ نے ریکارڈ آف دی ایئر کا ایوارڈ جیتا تھا۔
گزشتہ سال اکتوبر 2025 میں جاپان کے تاریخی شہر کیوٹو کے ایک ہوٹل میں میکس نے ملی کو شادی کی پیشکش کی تھی، جس کے بعد دسمبر 2025 میں ان کی منگنی منظر عام پر آئی۔
ملی سائرس کی یہ دوسری شادی ہے، اس سے قبل وہ 2018 میں اداکار لیم ہیمس ورتھ کے ساتھ رشتہ ازدواج میں بندھی تھیں، تاہم 2020 میں ان کی طلاق ہو گئی تھی۔ ملی سائرس نے اپنی اس نئی زندگی کو ایک نئی اور پختہ شروعات قرار دیا ہے۔
یوں کئی سال تک نجی رہنے والا یہ تعلق اب شادی کے بندھن میں بندھ گیا ہے۔
























