خوشی کے موقعوں اور تہواروں پر ہاتھوں اور پیروں پر مہندی رچانا ہماری پرانی روایت ہے لیکن کیا آپ کو معلوم ہے کہ وہ گہرے سیاہ رنگ والی مہندی جو دیکھنے میں بہت اچھی لگتی ہے، صحت کے لیے نقصان دہ ثابت ہو سکتی ہے؟
عام طور پر قدرتی مہندی کا رنگ ہلکا نارنجی، سرخ یا سرمئی براؤن ہوتا ہے۔ اس کا رنگ وقت کے ساتھ مزید گہرا ہوسکتا ہے۔ خالص قدرتی مہندی عام طور پر چند ہی لمحوں میں بالکل کالا رنگ نہیں دیتی۔ لیکن جو مہندی لگاتے ہی بالکل کالی ہو جائے، اس میں خطرناک کیمیکل ملے ہونے کا خدشہ ہوتا ہے۔
طبی ماہرین کے مطابق بازار میں ملنے والی بعض کالی مہندیوں میں پی پی ڈی یعنی پیرا فینیلینڈائین نامی کیمیکل اور دوسرے مضر رنگ استعمال کیے جاتے ہیں۔ یہ کیمیکل وہی ہوتا ہے جو عام طور پر بالوں کے رنگ یعنی ہیئر ڈائی میں ڈالا جاتا ہے۔
اس کیمیکل کی وجہ سے مہندی کا رنگ بہت جلدی گہرا کالا ہو جاتا ہے لیکن یہ جلد کے لیے بہت نقصان دہ ثابت ہوتا ہے۔
اس کیمیکل کی وجہ سے جلد پر شدید الرجی اور سوزش ہو سکتی ہے۔ مہندی لگانے والی جگہ پر اگر جلن، خارش، لال نشان، سوجن یا چھالے بننے لگیں تو اسے معمولی نہ سمجھا جائے۔
بعض اوقات یہ الرجی صرف اسی جگہ تک محدود نہیں رہتی بلکہ پورے جسم پر خارش اور ایکزیما جیسی تکلیف شروع ہو جاتی ہے۔
اس کے علاوہ کیمیکل والی مہندی سے جلد پر دانے نکل سکتے ہیں اور گہری سوزش بھی ہو سکتی ہے۔
ماہرین کا کہنا ہے کہ پی پی ڈی سے ہونے والی حساسیت ایک اہم مسئلہ ہے۔ ایک بار اگر کسی انسان کو اس کیمیکل سے الرجی ہو جائے تو اس کا جسم اسے یاد رکھتا ہے اور مستقبل میں جب بھی کبھی وہ بالوں کے رنگ یا ایسی کسی اور چیز کا استعمال کرے گا تو اسے پھر سے شدید الرجی ہو سکتی ہے۔ اس لیے صرف گہرے رنگ کے چکر میں مصنوعی اور کیمیکل والی مہندی لگانے سے گریز کرنا چاہیے۔
ماہرین کے مطابق جلد پر ردعمل ہمیشہ فوراً ظاہر نہیں ہوتا، اس لیے مہندی لگانے کے بعد کچھ وقت تک جلد کی حالت پر نظر رکھنا بھی ضروری ہے۔
اگر کبھی مہندی لگانے کے بعد جلد پر جلن یا خارش شروع ہو جائے تو فوراً اسے دھو کر صاف کر لیں اور اس جگہ کو بالکل نہ کھجائیں اور مشکوک مہندی یا اس جیسی کسی دوسری مصنوعات کا استعمال دوبارہ نہ کریں۔
اگر سوجن زیادہ بڑھ جائے یا سانس لینے میں تکلیف جیسی کوئی بھی سخت علامت ظاہر ہو تو فوراً ڈاکٹر کے پاس جائیں۔ ہمیشہ خالص اور قدرتی مہندی کا استعمال کریں تاکہ آپ کی جلد محفوظ رہے۔
اس لیے اگلی بار مہندی لگاتے وقت یہ بات ذہن میں رکھیں کہ زیادہ گہرا رنگ لازماً زیادہ اچھی مہندی کی علامت نہیں ہوتا۔
